Policia e Kosovës ka sqaruar se ndalimi i hyrje-daljeve dhe parkimit të automjeteve në hapësirat e Kuvendit të Kosovës dhe Presidencës, gjatë ditës së sotme, është bërë me kërkesë zyrtare të institucioneve përkatëse.
Sipas Policisë, Drejtoria e Shërbimeve Teknike e Kuvendit të Republikës së Kosovës i ka dërguar shkresë zyrtare Policisë, duke kërkuar që më 8 shtator 2026, përveç veturave zyrtare të Kuvendit dhe Zyrës së Presidentes së Kosovës, të mos lejohet hyrja, dalja dhe parkimi i automjeteve në hapësirat përkatëse.
Policia ka bërë të ditur se arsyeja e kësaj mase ishte pastrimi i oborrit dhe hapësirave të parkingut me mekanizëm adekuat, në të gjitha hyrje-daljet dhe parkingjet e objekteve.
Sipas kërkesës zyrtare, gjatë ditëve në vijim pritet të rikthehen procedurat e rregullta për hyrje-daljet dhe parkimin e personave të autorizuar.
Policia e Kosovës ka theksuar se veprimet e saj janë ndërmarrë në përputhje me autorizimet ligjore dhe kushtetuese.
“Policia e Kosovës është institucion i zbatimit të ligjit dhe të gjitha veprimet e saja i ndërmerr konform autorizimeve ligjore dhe kushtetuese, përfshirë edhe në rastin e zbatimit të kërkesave zyrtare të institucioneve të Republikës së Kosovës”, thuhet në komunikatën e PK-së./teve1.info/
