Që në orët e hershme të mëngjesit Policia e Kosovës është duke kryer një aksion në qytetin e Kaçanikut.
Tëvë 1 mëson se aksioni ndërlidhet me rastin e vrasjes së rreshterit policor, Muhamed Lika.
“Sot, në orët e hershme të mëngjesit, Policia e Kosovës me njësitë e saja relevante ka filluar një operacion policor, i cili po realizohet në komunën e Kaçanikut. Edhe në këtë rast pas përfundimit të operacionit policor, i cili po realizohet në bashkëpunim dhe koordinim me organet e drejtësisë, do të bëhen publike informacione shtesë”, ka deklaruar zëdhënësi i policisë, Baki Kelani për Tëvë1.
Ndryshe, Policia e Kosovës mëngjesin e 22 prillit ka kryer një operacion të madh policor në Kaçanik, që ndërlidhej me vrasjen e rreshterit policor Muhamed Lika, ku janë arrestuar shtatë persona.
Për këtë rast, shtatë persona të cilët dyshohen se e planifikuan dhe e realizuan vrasjen, ndodhen tashmë në paraburgim.
I ndjeri me ta përfunduar punën, në ora 22:50 minuta ishte nisur për në banesën e tij.
Përgjatë gjithë kësaj kohe, ai ishte nën përcjelljen e grupit që dyshohet se ekzekutoi vetëm pak minuta më vonë.
“I pandehuri Haki Bela pasi që kishte qëndruar në lokalin e tij, prej aty niset në drejtim të Stacionit Policor ku përballë kalohet me viktimën Muhamet Lika, pastaj viktima vazhdon në drejtim të banesës, ndërsa i pandehuri Haki vazhdon drejt rrugës ‘UÇK’ për 20 metra dhe pas 30 sekondave kthehet në drejtim të viktimës”, thuhet në dosjen e Prokurorisë.
Dosja e Prokurorisë, rreshteri Lika u vra pak minuta pasi doli nga stacioni policor
