Përball shkollës së mesme teknike në Mitrovicën Veriore, Policia e Kosovës ka sekuestruar mjete të rrezikshme të cilat sipas tyre, mund të përdoreshin për sulme te reja, të ngjashme me ato të 24 shtatorit në Banjskë të Zveçanit. Paralajmërime të tilla ditë më parë dha edhe vet kryeministri i Kosovës, Albin Kurti, i cili vetëm një ditë më pas, udhëtoi për vizitë privatë në Norvegji.
Me 24 shtator, një grup terrorist serb sulmoi Policinë e Kosovës.
E uniforma të ngjashme me ato që i pati ky grup, u panë edhe një herë në veriun e vendit.
Këto të fundit u konfiskuan nga Policia e Kosoves, të hënën.
I gjithë aksioni ndodhi në afërsi të Lagjës së Boshnjakëve, përballë shkollës së mesme teknike.
Sipas Policisë së Kosovës, mjetet e sekuestruara mund të përdoreshin për sulme të tjera ndaj tyre.
“Njësitet kompetente policore bazuar në informacione relevante pranuar nga qytetarët kanë ndërmarr veprime të menjëhershme hetimore dhe operative me ç‘rast në lagjen e boshnjakëve në Mitrovicë veri, kanë realizuar një operacion kontrolli dhe aty kanë gjetur: tela gjemborë të improvizuar (iriqë), bomba tymosëse, municion dhe një uniformë. Vlen të potencohet se uniforma e gjetur sot është e ngjashme me uniformat që janë përdorur nga grupi terrorist në Banjskë në shtator të këtij viti”, ka deklaruar Policia e Kosovës.
Se veriu i Kosovës, mund të përballet me sulme të reja të ngjashme me atë të Banjkës, ditë më parë e tha edhe kryeministri i vendit, Albin Kurti.
E një ditë pas këtij paralajmërimi, Kurti udhëtoi për në Norvegji për një vizitë private.
Ky udhëtim i kryeministrit pas paralajmërimeve serioze, po shihet si shqetësues nga ekspertët e sigurisë.
“Fakti që kryeministri i Republikës së Kosovës, pas paralajmërimit serioze të sigurisë ka lëvizur në drejtim të Norvegjisë tek familjarët, është një shqetësim serioz ngase nuk jemi të sigurt nëse kryeministri do të mund të jap kontributin e tij në përgjegjësitë që ka me ligj”, tha eksperti i sigurisë, Bedri Elezi.
Ndryshe, pas ngjarjeve të fundit në Banjskë të Zvecanit, edhe KFOR ka shtuar prezencën ushtarake në Kosovë.
