Policia e Kosovës ka njoftuar se ka sekuestruar armën e zjarrit me të cilën dyshohet se ndodhi vrasja nga pakujdesia e një burri në bjeshkët e Strellcit, në komunën e Deçanit.
Sipas njoftimit të Policisë, në vendin e ngjarjes janë gjetur dhe sekuestruar një armë zjarri, një karikator i zbrazët dhe 24 fishekë. Të gjitha këto janë konfiskuar në cilësinë e provave materiale dhe do të përdoren në procedurën hetimore.
Ngjarja ka ndodhur më 23 korrik, në oborrin e një stani në bjeshkët e Strellcit, ku viktima humbi jetën si pasojë e plagëve të marra nga arma e zjarrit.
Sipas hetimeve fillestare, i dyshuari është djali i viktimës, i cili dyshohet se e ka qëlluar babanë nga pakujdesia.
Policia bëri të ditur se njësitë policore kanë reaguar menjëherë pas pranimit të informacionit për rastin, ndërsa ekipi mjekësor ka konstatuar vdekjen e viktimës në vendin e ngjarjes.
Hetimet po zhvillohen nga Sektori Rajonal i Hetimeve në Drejtorinë Rajonale të Policisë në Pejë, në koordinim me Prokurorin e Shtetit. Rasti është iniciuar si “vrasje nga pakujdesia”.
Me urdhër të prokurorit, trupi i pajetë është dërguar në Institutin e Mjekësisë Ligjore për obduksion, ndërsa i dyshuari është intervistuar dhe më pas është ndaluar për 48 orë.
Policia ka bërë të ditur se hetimet për zbardhjen e plotë të rrethanave të rastit janë në vazhdim.
