Policia e Kosovës, në bashkëpunim të ngushtë me Prokurorinë Themelore në Prizren, ka realizuar sot një operacion të gjerë policor në tërë territorin e Republikës së Kosovës, si rezultat i një hetimi disa mujor.
Sipas njoftimit zyrtar, gjatë këtij operacioni janë zbatuar masa të veçanta hetimore me qëllim të luftimit të krimeve ekonomike. Aksioni ka përfshirë disa lokacione dhe ka rezultuar me arrestimin e 39 personave të dyshuar.
Po ashtu, gjatë bastisjeve janë sekuestruar mjete të konsiderueshme financiare, armë, ari si dhe prova të tjera materiale që dyshohet se lidhen me veprimtari të kundërligjshme.
Policia e Kosovës ka theksuar se mbetet e përkushtuar në parandalimin dhe luftimin e krimit të organizuar dhe veprimtarive të tjera ilegale, në funksion të forcimit të sundimit të ligjit dhe rritjes së sigurisë publike në vend.
