Policia e Kosovës ka parandaluar një rast kontrabande me rreth 155 kilogramë duhan të ardhur nga Serbia.
Malli i kontrabanduar është zbuluar gjatë realizimit të planit operativ “Gatishmëria vepruese 2026”.
Policia ka njoftuar se vetura në të cilën gjendej malli ka qenë e drejtuar nga B. R., mashkull, shtetas i Serbisë, i lindur në vitin 1967, me vendbanim në Serbi, i cili dyshohet se kishte depërtuar ilegalisht në territorin e Republikës së Kosovës me qëllim transportimin e mallrave të kontrabanduara.
“Gjatë kontrollit të detajuar të automjetit, zyrtarët policorë kanë zbuluar dhe kanë sekuestruar një sasi të konsiderueshme të duhanit të dyshuar të kontrabanduar, të markave të ndryshme, konkretisht: 310 pako duhan nga 500 gramë secila, me peshë totale rreth 155 kilogramë; 41 paketime të zbrazëta, të gatshme për tregtim ilegal. Sasia e konsiderueshme e duhanit dyshohet se ishte destinuar për tregun ilegal, me qëllim shmangien e procedurave doganore dhe përfitim të kundërligjshëm financiar”, thuhet në komunikatë./teve1.info/
