Policia e Kosovës në veri ka realizuar projektin “Rreze drite në emblemën time”, në kuadër të aktiviteteve për shënimin e 27-vjetorit të themelimit të Policisë së Kosovës.
Aktiviteti, i mbajtur më 4 shtator nën moton “Një rrugëtim i përbashkët, një mision i përhershëm”, kishte në fokus fëmijët dhe forcimin e bashkëpunimit ndërmjet Policisë dhe komunitetit.
Me këtë rast, stacionet policore në veri të vendit kanë hapur dyert për qytetarët, duke mirëpritur nxënës të shkollave fillore. Nxënësit patën mundësinë të vizitojnë hapësirat policore dhe të njihen nga afër me punën dhe përgjegjësitë e zyrtarëve policorë.
Sipas Policisë, pjesëmarrja e fëmijëve synon të kontribuojë në ndërtimin e besimit ndërmjet Policisë dhe komunitetit që në moshë të hershme.
Në kuadër të aktiviteteve të Drejtorisë Rajonale të Policisë Mitrovicë Veri, janë shpërndarë edhe kartela identifikuese për anëtarët e Këshillave Lokale për Siguri Publike (KLSP), si dëshmi e bashkëpunimit dhe partneritetit të vazhdueshëm ndërmjet Policisë dhe komunitetit.
Policia e Kosovës ka theksuar se do të vazhdojë me aktivitete të tilla, me synim forcimin e komunikimit dhe bashkëpunimit me qytetarët, veçanërisht me fëmijët dhe të rinjtë.
