Njësitë e Policisë së Kosovës kanë sekuestruar dy armë zjarri të tipit “zolla” në një kompleks banesor të pabanuar në rrugën “Anka Spaic” në Mitrovicë të Veriut.
Sipas njoftimit zyrtar, më 21 korrik 2025, rreth orës 14:05, Policia e Kosovës – përmes rrugëve operative – ka pranuar informacione për mundësinë e pranisë së armëve në këtë lokacion. Në vendin e ngjarjes kanë ndërhyrë njësitë relevante policore, përfshirë edhe njësinë e specializuar për trajtimin e mjeteve shpërthyese.
Gjatë kontrollit në objektin e braktisur, janë gjetur dhe sekuestruar dy armë të llojit “zolla”, prodhim serb. Të njëjtat janë konfiskuar si dëshmi materiale për procedura të mëtejshme ligjore.
Hetimet lidhur me rastin janë në vazhdim, ndërsa Prokurori i Shtetit është njoftuar për të gjitha veprimet. Me urdhër të tij, është iniciuar rasti penal për veprën “Mbajtje në pronësi, kontroll ose posedim të paautorizuar të armëve.”
Policia e Kosovës thekson përkushtimin e saj për ruajtjen e sigurisë publike dhe u bën thirrje qytetarëve që të raportojnë çdo aktivitet të dyshimtë përmes kanaleve zyrtare të komunikimit.
Postimi :
