Policia e Kosovës ka arritur të parandalojë një përleshje të planifikuar ndërmjet dy grupeve të të rinjve në Mitrovicë, duke arrestuar 15 persona të dyshuar.
Sipas njoftimit zyrtar, rasti është parandaluar falë informacioneve të siguruara në rrugë operative nga njësitet e Stacionit Policor në jug të qytetit, të cilat kanë reaguar dhe kanë ndërhyrë në kohë për të shmangur eskalimin e situatës.
“Policia ka arritur të lokalizojë dy grupet e përfshira dhe ka vënë situatën nën kontroll pa lejuar që të ndodhë ndonjë incident fizik”, thuhet në njoftim nga Policia e Kosovës.
Arrestimet janë kryer në dy lokacione të ndara dhe të gjithë të dyshuarit janë shoqëruar në stacionin policor. Duke qenë se shumica janë të mitur, intervistimi po bëhet në prani të prindërve dhe zyrtarëve nga Qendra për Punë Sociale (QPS).
Hetimet janë duke vazhduar në bashkëpunim me prokurorin kompetent, ndërsa Policia e Kosovës thekson se mbetet e përkushtuar në ruajtjen e rendit dhe sigurisë publike.
Autoritetet gjithashtu kanë falënderuar qytetarët për bashkëpunimin dhe raportimin e rasteve të tilla.
