Policia në Ferizaj ka njoftuar se në dy raste të ndara ka sekuestruar gjithsej tri armë zjarri dhe ka iniciuar procedura penale ndaj dy personave të dyshuar.
Në rastin e parë, të ndodhur më 13 prill, një 47-vjeçar është identifikuar për posedim të kundërligjshëm të armës. Gjatë kontrollit në banesën e tij, me bashkëpunim të vetë të dyshuarit, policia ka gjetur dhe sekuestruar një armë zjarri. Ndaj tij është iniciuar procedurë penale për “Mbajtje në pronësi, kontroll ose posedim të paautorizuar të armëve”.
Rasti i dytë është regjistruar dje në fshatin Nekodim të Ferizajt, pas një konflikti verbal mes dy personave të moshës 35 dhe 43-vjeç. Të dy janë shoqëruar në polici, ndërsa gjatë kontrollit në shtëpinë e 35-vjeçarit janë sekuestruar një pushkë gjahu, një pistoletë me dy karikatorë dhe municion.
Ndaj të dyshuarit është iniciuar rast për veprën penale “Kanosja”, ndërsa hetimet për armët e sekuestruara po vazhdojnë nga Njësiti i Hetimeve. /teve1.info/
