Pasditen e sotme, në fshatin Vuqë të Komunës së Leposaviqit, Policia Kufitare ka ndaluar një veturë pa targa, e cila po lëvizte në drejtim të patrullës policore.
Sipas zëvendësdrejtorit për veriun e Kosovës, Veton Elshani, pas ndalimit të automjetit dhe kërkesës së policëve që dy personat brenda tij të dilnin jashtë, njëri prej tyre ka ikur duke shfrytëzuar terrenin.
Policia është vënë në ndjekje dhe pas një kohe personi i dyshuar është ndalur, por ka nxjerrë një objekt nga brezi dhe ua ka drejtuar policëve.
“Në atë moment, njëri nga policët ka shkrepur një të shtënë paralajmëruese nga arma e tij, ndërsa personi ka arritur të largohet”, ka deklaruar Elshani.
Më vonë, i njëjti është paraqitur në Polici së bashku me avokatin e tij.
Ndërkaq, është bërë e ditur se rasti po hetohet nga Inspektorati Policor i Kosovës me autorizim të Prokurorit të Shtetit.
