Policia e Kosovës ka parandaluar dy raste të transportit të kundërligjshëm të drunjve për djegie në Podujevë, gjatë orëve të hershme të mëngjesit në fshatin Lluzhan.
Sipas njoftimit të policisë, rasti i parë është evidentuar rreth orës 02:20, kur zyrtarët policorë kanë ndaluar një kamion të ngarkuar me masë drunore për djegie, i cili nuk posedonte dokumentacionin përkatës dhe fletë përcjellëse.
“Drutë janë konfiskuar dhe dërguar për matje në Agjensionin e Pyjeve. I dyshuari, pas intervistimit dhe me vendim të prokurorit, është liruar në procedurë të rregullt”, thuhet në njoftimin e policisë.
Ndërkohë, vetëm pak më vonë, rreth orës 03:10, gjatë patrullimit në të njëjtin fshat, policia ka ndaluar edhe një kamion tjetër të ngarkuar me drunj.
Edhe në këtë rast, sipas policisë, sasia e drunjve është konfiskuar dhe dërguar për matje në Agjencia e Pyjeve e Kosovës.
“I dyshuari është shoqëruar në stacion policor për intervistim dhe më pas është liruar në procedurë të rregullt”, bëhet e ditur nga policia.
Autoritetet kanë theksuar se do të vazhdojnë kontrollet dhe patrullimet në terren për të parandaluar prerjen dhe transportin e kundërligjshëm të drunjve.
