Policia e Kosovës (PK), ka mohuar raportimet në media se Njësisë Speciale Intervenuese i janë hequr kompetencat që kanë të bëjë me terrorizimin.
Në një reagim për media nga PK-ja thuhet se kompetencat e kësaj njësie janë të rregulluara me përshkimin e detyrave dhe përgjegjësisë së vendit të punës dhe të njëjtat nuk kanë ndryshuar.
“Të gjitha autorizimet policore janë të përcaktuara me ligj dhe akte tjera normative të cilat në vija të përgjithshme përshkruajnë organizimin dhe strukturimin e brendshëm policorë, përderisa detyrat specifike të punonjësve sipas pozitave, përshirë Drejtorinë e Njësisë Speciale Intervenuese, janë të rregulluara me përshkrim të detyrave dhe përgjegjësive të vendit të punës, autorizime dhe detyra këto të cilat kanë qenë dhe mbesin të pa ndryshuara”, thuhet në reagimin e PK-së përcjell teve1.info.
Policia ka thënë njësive të specializuara u është kushtuar rëndësi e veçantë përmes strukturës organizative.
“Për më shumë, bazuar në strukturën organizative të Policisë së Kosovës e ndryshuar dhe miratuar vitin e kaluar, njësive të specializuara i është kushtuar rëndësi e veçantë, duke i ngritur nga siç ka qenë Divizion i Njësive të Specializuara, tani në Departament të Njësive të Specializuara, përfshirë këtu edhe avancimin e NJSI-së nga Njësi në nivel të Drejtorisë”, thuhet tutje.
Vitin e kaluar pjesëtarët e Njësisë Intervenuese të PK-së por edhe njësitet tjera kanë protestuar dy herë para Qeverisë së Kosovës, duke kërkuar kushte më të mira.
