Policia e Kosovës ka zhvilluar një bastisje mbrëmjen e së enjtes në një lokal në rrugën “Blerim Zuqaku” në Vushtrri, nën dyshimin se aty po zhvillohej organizim i skemave piramidale dhe bixhoz i paligjshëm.
Sipas njoftimit të Policisë, bastisja është realizuar nga hetuesit e Sektorit Rajonal të Hetimeve, me mbështetjen e Njësisë për Reagim të Shpejtë (NJRSh).
“Nën dyshimin e bazuar për veprimtari të dyshimta, hetuesit e Sektorit Rajonal të Hetimeve, në mbështetje të Njësisë për Reagim të Shpejtë (NJRSh), në orët e mbrëmjes së datës 23 tetor 2025, në rrugën ‘Blerim Zuqaku’ në Vushtrri, kanë realizuar bastisje në një lokal ku zhvillohej veprimtari e kundërligjshme – ‘Organizim i skemave piramidale dhe bixhozit të paligjshëm’”, thuhet në njoftimin e Policisë së Kosovës.
Gjatë operacionit janë sekuestruar aparatë dhe mjete të ndryshme që shërbenin për zhvillimin e lojërave të fatit dhe aktiviteteve të paligjshme.
“Në vendin e ngjarjes janë sekuestruar aparate dhe mjete të ndryshme që shërbejnë për lojëra fati e bixhozi”, thuhet më tej në njoftim.
Policia ka bërë të ditur se pronari i lokalit është intervistuar në cilësinë e të dyshuarit, ndërsa pas intervistimit është liruar në procedurë të rregullt.
“Lidhur me rastin, në cilësi të të dyshuarit është intervistuar pronari i lokalit, i cili pas intervistimit është liruar në procedurë të rregullt”, thekson policia.
Ndaj të njëjtit është iniciuar rast penal për veprën “Organizim i skemave piramidale dhe bixhozit të paligjshëm”, ndërsa hetimet janë duke vazhduar në koordinim me Prokurorinë Themelore të Mitrovicës.
