Policia e Kosovës ka njoftuar për largimin nga puna të togerit policor me inicialet A.V., me detyrë në Drejtorinë për Hetimin e Trafikimit me Qenie Njerëzore (DHTQNJ) në Pejë.
Sipas komunikatës zyrtare të Policisë së Kosovës, ndaj zyrtarit, që nga inkuadrimi i tij në polici e deri në largimin nga detyra, janë iniciuar gjithsej 15 raste për shkelje disiplinore. Prej tyre, 13 janë trajtuar në nivel qendror dhe dy në nivel rajonal.
Policia thotë se rastet janë trajtuar nga mekanizmat e brendshëm të kontrollit në mënyrë profesionale dhe të pavarur, ndërsa për trajtimin dhe hetimin e rasteve ndaj zyrtarëve policorë ekziston edhe Inspektorati Policor i Kosovës si mekanizëm i jashtëm.
Nga 15 rastet e iniciuara, tri kanë të bëjnë me shkrime dhe komente në rrjete sociale. Për këto raste, sipas Policisë, janë shqiptuar gjithsej gjashtë masa disiplinore.
Në vitin 2016, ndaj zyrtarit ishte shqiptuar masa e ndalesës në pagë prej 30 për qind për dy muaj, ndërsa për një rast të iniciuar në vitin 2025, masa e shqiptuar në vitin 2026 ishte ndalesë në pagë prej 30 për qind për gjashtë muaj.
Rasti i fundit, i iniciuar dhe i trajtuar gjatë gushtit 2026, ka përfunduar me masën “Ndërprerje e marrëdhënies së punës”.
Policia e Kosovës thotë se vendimi është marrë pasi zyrtari ka vazhduar me shkelje të njëjta, duke rënë në kundërshtim me procedurat e përcaktuara me Udhëzimin Administrativ nr. 04/2019 për Shkeljet, Masat dhe Procedurat Disiplinore në Policinë e Kosovës.
Në komunikatë përmenden, ndër të tjera, dispozitat që lidhen me sjelljen e rëndë diskredituese, mosbindjen e rëndë dhe shkeljen e rëndë të autorizimit, përfshirë publikimin, shfaqjen, shpërndarjen apo komentimin e postimeve, fotografive, videove dhe incizimeve që dëmtojnë imazhin e Policisë së Kosovës.
Policia ka bërë të ditur se palëve, lidhur me vendimet e marra, u jepet këshillë juridike për të drejtën e ankesës në gjykatën kompetente.
Në fund, Policia e Kosovës ka theksuar se mbetet e përkushtuar në trajtimin e rasteve disiplinore në mënyrë të drejtë dhe profesionale, me synim ruajtjen e rendit dhe sigurisë publike, si dhe të imazhit profesional të institucionit./teve1.info/
