Përmes njoftimit, Policia ka treguar se në rastin e parë nga njësia e Task Forcës është vërejtur një automjet i dyshuar duke hyrë nga fshati Breznicë.
Automjeti është përcjellë dhe ndaluar në Gjilan dhe është i njofur si recidivist i kontrabandimit dhe te ai në bagazh të veturës janë gjetur rreth 300 kilogramë fruta për të cilat nuk kishte dokument.
“I njëjti automjet është përcjellë dhe është ndaluar në Gjilan rreth orës 16:05 me drejtues A. A. mashkull kosovar, i njohur për Policinë si recidivist i veprave penale të kontrabandimit të mallrave. Gjatë kontrollit tek i njëjti në bagazh të veturës dhe ulëseve prapa kishte pasur të ngarkuara rreth 300 kg. fruta (kumbulla të thara) të përpunuara për të cilat nuk kishte asnjë dokument përcjellës për origjinën dhe përmbajtjen e tyre, të cilat dyshohet se janë sjellë nga Republika e Serbisë”, thuhet në njoftim.
Kurse, në rastin e dytë është ndaluar një automjet në fshatin Stubëll të Vitisë në ardhje nga Maqedonia e Veriut.
Gjatë kontrollit të automjetit është parë se ishin të ngarkuara 15 thasë duhan i përpunuar, mall të cilin do ta dërgonin në një fshat të Vitisë.
“Të dyshuarit mallin kishin në plan për ta dërguar te një person në një fshat të komunës së Vitisë, ku nga njësia e Task Forcës është identifikuar edhe personi i tretë në rast, tek shtëpia e të cilit janë sekuestruar edhe 10 thasë duhan të njëjtë. Për të gjitha këto veprime është njoftuar edhe prokurori kujdestar i shtetit, i cili ka urdhëruar që rastet të iniciohet ‘kontrabandim me mallra’, kurse malli të sekuestrohet dhe të dërgohet në Doganë. Rastet janë duke u trajtuar nga njësitë përkatëse policore nga Drejtoria Rajonale Kufitare Lindje në bashkëpunim me Prokurorinë e Shtetit dhe Doganën e Kosovës”, thuhet tutje në njoftim./teve1.info/
