Policia e Kosovës ka zhvilluar një takim koordinues me koordinatorët e Drejtorive Rajonale të Policisë për Projekte dhe Komunitet, ku u diskutuan masat e sigurisë për fillimin e vitit të ri shkollor 2026–2027.
Gjatë takimit, pjesëmarrësit shqyrtuan koordinimin me Drejtoritë Komunale të Arsimit dhe drejtoritë e shkollave, si dhe masat parandaluese që do të ndërmerren për garantimin e sigurisë së nxënësve.
Këto masa përfshijnë patrullime të shtuara pranë shkollave, mbajtjen e ligjëratave edukative dhe organizimin e aktiviteteve ndërgjegjësuese.
“Qëllimi i këtij takimi ishte diskutimi dhe koordinimi për dy tema konkrete”, thuhet në njoftimin e Policisë së Kosovës.
Përveç përgatitjeve për vitin e ri shkollor, në takim u diskutua edhe organizimi i aktiviteteve që do të zhvillohen me rastin e shënimit të Ditës së Policisë.
Në përfundim të takimit, koordinatorët u pajisën me materiale edukative dhe ndërgjegjësuese, të cilat do të përdoren nga zyrtarët policorë gjatë ligjëratave dhe aktiviteteve të organizuara për fëmijët në shkolla.
