Hetuesit policor nga Sektori për Hetimin e Krimeve Ekonomike kanë kontrolluar 10 barnatore në Prizren, në të cilat dyshojnë se janë shitur produkte farmaceutike pa banderola dhe të njëjtat dyshohet se janë kontrabanduar, madje janë të rrezikshme për jetën e qytetarëve.
Policia e Kosovës ka bërë të ditur se në njërën nga barnatoret është gjetur një sasi e barnave pa banderola, të cilat ishin fshehur mbrapa rafteve të lokalit.
“Barnat pa banderola janë konfiskuar nga Dogana e Kosovës, kurse hetuesit policorë e kanë shoqëruar një person të dyshuar në Stacionin Policor në Prizren si pronar i disa barnatoreve të cilat janë kontrolluar”, thuhet në njoftim.
Në njoftim thuhet se i dyshuari është intervistuar në prani të avokatit mbrojtës dhe më pas i njëjti është liruar.
Ndërsa, pas intervistimit është njoftuar prokurori kujdestar, i cili ka udhëzuar që rasti të iniciohet “Prodhimi dhe shpërndarja e produkteve të dëmshme mjekësore” dhe “Tregti e ndaluar”. /teve1.info/
