Dy persona, një burrë dhe një grua, dyshohet se janë vrarë nga të shtënat me armë zjarri në fshatin Livoç i Ulët të Gjilanit, ndërsa një person tjetër ka mbetur i plagosur.
Sipas njoftimit të Policisë së Kosovës, rasti është raportuar më 9 tetor, rreth orës 14:25, pas së cilës njësitë relevante policore dhe dy prokurorë të Shtetit kanë dalë në vendin e ngjarjes.
Policia ka bërë të ditur se viktima e parë, një person i gjinisë mashkullore, rreth 30-vjeçar, është gjetur pa shenja jete brenda një veture.
Ndërkaq, në Spitalin e Përgjithshëm në Gjilan është dërguar pa shenja jete edhe një grua rreth 30-vjeçare, e cila dyshohet se është vrarë nga arma e zjarrit nga i njëjti i dyshuar.
Nga ky incident ka mbetur i plagosur edhe një person tjetër, i cili, pas marrjes së ndihmës së parë në Emergjencën e Spitalit të Gjilanit, është transferuar në Qendrën Klinike Universitare të Kosovës (QKUK) për trajtim të mëtejshëm.
Sipas informatave fillestare të policisë, dyshohet se mes të dyshuarit dhe viktimave ekziston një lidhje familjare. Megjithatë, motivi i ngjarjes ende nuk dihet.
I dyshuari është vetëdorëzuar në polici, ndërsa gjatë veprimeve policore është sekuestruar edhe një armë zjarri, e cila dyshohet se është përdorur në këtë rast.
Policia e Kosovës, në koordinim me Prokurorin e Shtetit dhe njësitë përkatëse hetimore, po vazhdon hetimet për të zbardhur plotësisht rrethanat e kësaj ngjarjeje, për të përcaktuar motivin dhe për të dokumentuar rastin.
“Sot, më 09.10.2026, rreth orës 14:25, Policia e Kosovës, përkatësisht Stacioni Policor në Gjilan, ka pranuar një informatë lidhur me të shtëna me armë zjarri në fshatin Livoç i Ulët, në Komunën e Gjilanit. Menjëherë pas pranimit të informatës, në vendin e ngjarjes kanë dalë njësitë relevante policore, si dhe dy prokurorë të Shtetit, me ç’rast është konstatuar se bëhet fjalë për një incident të rëndë, ku dyshohet se nga arma e zjarrit është vrarë një person i gjinisë mashkullore, rreth 30-vjeçar, i cili është gjetur brenda një veture.Poashtu ne vendin e ngjarjes ka dal edhe Drejtori i DRP,Gjilan. Në Spitalin e Përgjithshëm në Gjilan është sjellë pa shenja jete një person i gjinisë femërore, rreth 30-vjeçare, e cila dyshohet se po ashtu është vrarë nga arma e zjarrit nga i njëjti i dyshuar. Ndërkohë, një person tjetër, i cili ka pësuar lëndime nga arma e zjarrit, pas marrjes së ndihmës së parë në Emergjencën e Spitalit të Përgjithshëm në Gjilan, është transferuar në Qendrën Klinike Universitare të Kosovës (QKUK), për trajtim të mëtejshëm mjekësor. Sipas informatave fillestare, dyshohet se në mes të të dyshuarit dhe viktimave ekziston një lidhje familjare. Deri në këtë fazë të hetimeve, motivi që ka çuar në këtë ngjarje të rëndë ende nuk dihet. I dyshuari është vetëdorëzuar,ndërsa gjatë veprimeve policore është sekuestruar edhe një armë zjarri, e cila dyshohet se është përdorur në rast. Policia e Kosovës, në koordinim me Prokurorin e Shtetit dhe njësitë relevante hetimore, është duke ndërmarrë veprimet e nevojshme hetimore me qëllim të sqarimit të plotë të rrethanave të ngjarjes, përcaktimit të motivit dhe dokumentimit të rastit”, thuhet në njoftimin e Policisë./teve1.info/
