Policia e Kosovës, përkatësisht Drejtoria Rajonale e Policisë në Pejë, ka lëshuar një kërkesë për bashkëpunim me qytetarët në gjetjen dhe arrestimin e të dyshuarit Elton Gjevukaj, nga fshati Bllagajë e Pejës.
Gjevukaj dyshohet për disa vepra penale, përfshirë dhunë në familje, mbajtje në pronësi, kontroll dhe posedim të paautorizuar të armëve, si dhe përdorim të armës apo mjetit të rrezikshëm. Ai ka lindur më 17 mars 2005.
Në njoftimin zyrtar, Policia e Kosovës njofton se, me autorizim të Prokurorisë Themelore në Pejë dhe në bazë të ligjit për publikimin e fotos dhe të dhënave të personave të kërkuar, po kërkon ndihmën e qytetarëve për lokalizimin e Gjevukajt.
“Policia e Kosovës kërkon nga qytetarët e Republikës së Kosovës që kushdo që ka informacion për vendndodhjen e personit të dyshuar në foton e bashkangjitur, të lajmërojë Policinë e Kosovës apo të kontaktojë stacionin më të afërt policor,” thuhet në komunikatë.
Çdo informacion mund të përcillet në mënyrë të sigurt dhe anonime në numrin pa pagesë 192 apo përmes platformës online të Policisë së Kosovës.
