Policia e Kosovës ka kërkuar bashkëpunimin e qytetarëve për gjetjen e 78-vjeçarit Xhafer Raqi, i cili është raportuar i zhdukur më 2 korrik 2026 në Prishtinë.
Sipas njoftimit zyrtar, që nga raportimi i rastit, njësitet policore të hetimeve, njësiti për kërkim-shpëtim i FSK-së dhe patrullat policore, në koordinim me prokurorinë dhe në bashkëpunim me familjarët, kanë ndërmarrë një sërë veprimesh për lokalizimin e tij.
Ndër veprimet e ndërmarra janë intervistimi i personave që mund të kenë informacione për vendndodhjen e tij, kontrollimi i hyrje-daljeve në të gjitha pikat kufitare, si dhe kërkimet në zonat që 78-vjeçari i kishte frekuentuar zakonisht, në ambiente të mbyllura dhe të hapura.
Policia ka bërë të ditur gjithashtu se është duke analizuar dhe hetuar çdo informacion që mund të lidhet me rastin, ndërsa kërkimet për gjetjen e tij janë ende në vazhdim.
Pas autorizimit nga prokurori i shtetit, Policia u ka bërë thirrje qytetarëve që të kontribuojnë me çdo informacion që mund të ndihmojë në gjetjen e Xhafer Raqit.
“Të gjithë ata që kanë çfarëdo lloj informacioni, që ndërlidhet me personin e sipër shënuar, t’i përcjellin ato policisë përmes numrit 192 apo në [email protected]”, theksohet në njoftim./teve1.info/
