Policia e Kosovës ka dhënë detaje të reja për vdekjen e ish-ushtarit të UÇK-së, Liman Musliu.
Sipas Policisë, Musliu dyshohet se ka vdekur, derisa ka qenë duke punuar në një objekt banesor në Prishtinë.
Ndërkohë që trupi i pajetë i tij është dërguar për obduksion në IML.
Për vdekjen e ish-ushtarit të UÇK-së, ka shprehur ngushëllime Forca e Sigurisë së Kosovës, përmes një postimi në Facebook.
“Njoftojmë të gjithë pjesëtarët e Forcës së Sigurisë së Kosovës dhe të Ministrisë së Mbrojtjes, se pas një aksidenti tragjik ka ndërruar jetë ish ushtari i Ushtrisë Çlirimtare të Kosovës, Trupave të Mbrojtjes dhe Forcës së Sigurisë së Kosovës, Liman Musliu, nga jeta ndahet në pozitën zyrtar civil në Shtabin e Përgjithshëm të Forcës së Sigurisë së Kosovës”, thuhet në njoftimin e FSK-së.
Ndërkaq, komandanti i FSK-së, gjenerallejtënant Bashkim Jashari, u ka shprehur ngushëllime familjes, miqve, shokëve, bashkëluftëtarëve e bashkëpunëtorëve në FSK, duke vlerësuar lartë kontributin dhe shërbimin e tij ndaj atdheut , me nder dhe dinjitet në të gjitha periudhat.
Ngushëllime për ndarjen tragjike të ish ushtarit të UÇK-së, zyrtarit civil në Shtabin e Përgjithshëm të FSK-së, Liman Musliu, përmes një postimi në Facebook, ka shprehur edhe ministri i Mbrojtjes, Ejup Maqedonci.
Policia e Kosovës thotë se rasti është cilësuar “Asgjësim, dëmtim ose heqje e pajisjeve mbrojtëse dhe rrezikim i sigurisë në vendin e punës”.
“Rr. Gucia, Prishtinë 09.11.2024-16:30. Raportohet se viktima mashkull kosovar ka qenë duke punuar në një objekt banesor. Në vendin e ngjarjes kanë dal njësitet përkatëse, ndërsa ekipi mjekësor ka konstatuar vdekjen e viktimës. Me vendim të prokurorit, trupi i pa jetë dërgohet në IML për obduksion”, thuhet në raportin ditor./teve1.info/
Vdes pas një aksidenti tragjik ish-ushtari i UÇK-së, Liman Musliu
