Policia e Kosovës, me datën 28 mars ka pranuar informacione se nga fshati Tanushë, Republika e Maqedonisë së Veriut, dy automjete janë duke kontrabanduar disa kafshë.
Sipas njoftimit, Policia ka ndërrmarë veprimet e nevojshme ku edhe është identifikuar lokacioni ku vendoseshin kafshët e kontrabanduara.
“Pas informacioneve të pranuara nga njësitë kompetente policore janë ndërmarrë veprime të menjëhershme në terren, duke bërë vëzhgimin e rrugëve ilegale, përmes të cilave po kryhej veprimtaria e dyshuar, ku si rezultat rreth orës 20:00 në fshatin Sodovinë e Qerkezve – Viti është identifikuar lokacioni ku po vendoseshin kafshët e kontrabanduara, në pronën e të dyshuarit M. J. viti i lindjes 1991, i cili dyshohet se me të vërejtur njësitë policore është larguar në drejtim të panjohur”, thuhet në njoftim.
Bëhet e ditur se Policia në vendin e ngjarjes ka hasur në dy automjete të dyshuara me targa vendore, ku pas kontrollit të tyre në njërin nga mjetet janë gjetur të ngarkuara tre krerë kafshë pa numër matrikulli, ndërsa thuhet se në mjetin tjetër janë vërejtur gjurmë të bartjes së kafshëve.
“Po ashtu kontrolli është realizuar edhe në stallën e oborrit, me ç’rast janë gjetur 11 (njëmbëdhjetë) gjedhe dhe 1 (një) viç që të gjitha pa nr. matrikulli por me veshë të shpuara, ku dyshohet se numrat matrikulues të tyre janë hequr”, thuhet tutje.
Teksa lidhur me rastin është njoftuar prokurori kompetent, me urdhër të të cilit është iniciuar rasti ‘kontrabandim me mallra’, po ashtu thuhet se janë njoftuar edhe inspektorët e AUV-it, ku nga ta është lëshuar procesverbal mbi konfiskimin e kafshëve të cilat janë tërhequr dhe janë dërguar në Terminalin Doganor te Dheu i Bardhë./teve1.info./
