Policia e Kosovës ka njoftuar se brenda 24 orëve të fundit janë regjistruar dy raste të vdekjeve të dyshimta në dy qytete të vendit.
Rasti i parë është shënuar në Prizren, ku një grua është gjetur pa shenja jete në një shtëpi. Njësitë policore dhe ekipi mjekësor kanë dalë në vendin e ngjarjes dhe kanë konstatuar vdekjen, ndërsa me vendim të prokurorit trupi i pajetë është dërguar në Institutin e Mjekësisë Ligjore për obduksion. Rasti është iniciuar si “hetim mbi vdekjen”.
Ndërkohë, një rast tjetër i ngjashëm është raportuar në Gjilan, ku një burrë është gjetur i vdekur në shtëpinë e tij. Policia dhe mjekët emergjentë kanë konfirmuar vdekjen e tij në vendngjarje. Edhe në këtë rast, me vendim të prokurorit, trupi i viktimës është dërguar në IML për obduksion, ndërsa provat materiale të rëndësishme janë konfiskuar për procedura të mëtejshme hetimore.
Policia ka bërë të ditur se hetimet për të dy rastet po vazhdojnë me qëllim të sqarimit të rrethanave dhe shkaqeve të vdekjeve.
