Policia e Kosovës ka njoftuar se sot ka ndërmarrë masa ndaj prindit të një të mituri, pasi në një video të publikuar në rrjete sociale ai shihej duke drejtuar një automjet pa të drejtë ligjore.
Në komunikatën për media theksohet se njësitet policore të stacionit të Obiliqit kanë identifikuar rastin dhe kanë vepruar menjëherë.
“Pas veprimeve policore, ndaj prindit – pronar i automjetit – është shqiptuar gjobë në bazë të legjislacionit në fuqi, për moskujdesin dhe lejimin e fëmijës së mitur të ngasë automjetin”, thuhet në njoftim.
Policia ka apeluar që prindërit dhe kujdestarët të tregojnë kujdes të shtuar për sigurinë e fëmijëve, duke mos lejuar veprime të tilla që cenojnë rendin dhe rrezikojnë jetën e tyre dhe të tjerëve në trafik.
