Policia e Gjilanit ka bërë thirrje publike për të gjithë qytetarët që kanë pranuar shërbime shëndetësore, konsulta, terapi ose medikamente nga Arianit Sllamniku, që të paraqiten për intervistim.
Sipas policisë, Njësia e Hetimeve Rajonale në Gjilan, me autorizim të Prokurorisë së Shtetit, ka nisur veprime hetimore për dyshimet për veprat penale “Ushtrim të kundërligjshëm të veprimtarisë mjekësore ose farmaceutike” dhe “Eksperimente të kundërligjshme mjekësore dhe testime të barnave”, për të verifikuar rrethanat e rasteve të dyshuara lidhur me shërbimet e ofruara nga Sllamniku.
“Në kuadër të këtyre hetimeve, Drejtoria Rajonale e Policisë në Gjilan fton të gjithë qytetarët që mund të jenë dëmtuar në formë materiale ose shëndetësore nga trajtimet apo medikamentet e ofruara nga personi në fjalë, që të paraqiten në ambientet e Njësisë së Hetimeve Rajonale për intervistim dhe zbardhjen e rrethanave të rastit”, thuhet në njoftimin e Policisë së Gjilanit.
Arianit Sllamniku është ndaluar për 48 orë, konfirmoi kryeprokurori i Gjilanit, Arben Kadriu.
