Për tetë ditë ishin bashkë në trajnimin për mbrojtjen e personave shumë të rëndësishëm.
Pjesëtarë të mbrojtjes së afërt të Policisë së Kosovës u trajnuan nga instruktorë me përvojë të policisë së Turqisë.
E për t’i përgëzuar për këtë arritje zyrtarët policorë, të mërkurën në kampin e Njësive Speciale erdhën përfaqësues shtetërorë, por edhe nga ambasada e Turqisë.
Ministri në detyrë i Punëve të Brendshme, Xhelal Sveçla falënderoi shtetin turk për ndihmën e treguar edhe ndaj institucioneve të sigurisë në Kosovë.
“I dëshmuar edhe në këtë rast ky kontribut i vazhdueshëm dhe pa rezervë i Turqisë dhe organizatave të saj ka mundësuar që përvojat më të mira të fituara nga policët tanë të përcillen te çdo gjeneratë e re e Policisë së Kosovës… Certifikimi i pjesëtarëve të Drejtorisë së Mbrojtjes së Afërt, është tejet i rëndësishëm pasi me njohuritë e fituara nga ky trajnim i avancuar do të kontribuojnë në aspektin e sigurisë jo vetëm të personaliteteve të vendit tonë por edhe atyre që vizitojnë Republikën e Kosovës”, tha Sveçla.
Derisa eprori i tyre, përgëzoi këtë njësi për profesionalizmin siç tha ai të treguar ndër vite.
“Kjo është dëshmuar që nga ajo kohë e deri më sot në asnjë rast VIP, personat që ne i kemi pasë në mbrojtje sikur ata të nivelit qeveritar por edhe delegacionet nuk kanë pësuar asnjëherë ndonjë lëndim apo ndonjë incident gjatë përcjelljes që ne kemi pasë mbi ta… Që dmth që kemi njësi të përgatitur, të pajisur dhe kogja mirë të disiplinuar”, u shpreh Gazmend Hoxha, drejtor i përgjithshëm i PK-së.
Kurse, ambasadori turk, Sabri Tunc Angili tha se Kosova nuk konsiderohet vetëm partner por edhe vëlla i natyrshëm i Turqisë, andaj mbështetja për institucionet e sigurisë nuk do të mungojë.
“Në këtë aspekt Turqia do të jetë gjithmonë pranë Kosovës për ta mbrojtur sovranitetin e saj, për ta ndërtuar shtetësinë e saj dhe në këtë aspekt institucionet e sigurisë janë shumë të rëndësishme. E falënderoj për punën e saj që e ka treguar organizata TIKA, policinë e Turqisë që ka mbështetur Policinë e Kosovës. Policia e Kosovës, pa pasur një orar të caktuar e në kushte të vështira, po kryen punët e tyre. Kjo pikërisht e bën edhe partner të ngushtë policinë e Turqisë dhe të Kosovës dhe ndërton një vëllazëri të natyrshme”, tha ai.
Në fund u ndanë mirënjohje për instruktorët e Policisë së Turqisë që trajnuan efektivët e Policisë së Kosovës.
Po ashtu, për përfundimin e trajnimit certifikata u ndanë edhe për pjesëtarët e Njësisë së Mbrojtjes së Afërt.
