Ministri i Punëve të Brendshme të Shqipërisë, Besfort Lamallari ka njoftuar se do të ngritet një njësi e veçantë në Policinë e Shtetit për Hetimin e Krimeve Mjedisore.
Lamallari gjatë një takimi me drejtuesit vendorë të Policisë së Shtetit, tha se edhe krimet mjedisore duhet të kenë një strukturë të specializuar sepse dëmi i shkaktuar prej tyre është i pallogaritshëm dhe vështirë i rikuperueshëm.
“Me miratimin e ligjit, të hyrë në fuqi të efekteve të tij, ka nevojë që edhe krimet mjedisore në total të kenë një strukturë të specializuar. Ne nuk mund t’u qasemi krimeve mjedisore si vepra dosido, të rasteve. Vetëm zjarret e këtij viti, dëmi është i pallogaritshëm. Si në fondin pyjor… sa vite, sa gjenerata i duhet atij fondi pyjor të rekuperohet”, tha Lamallari.
Ministri theksoi se duhet të ketë një qasje më proaktive kundrejt këtyre problemeve dhe se duhet të ndryshojë një sjellje e trashëguar nga e kaluara.
“E sot Evropa e mbarë flet për krimet mjedisore. Ne nuk mund të vazhdojmë të konsiderojmë prerjen e pyjeve, apo lavatriçet e lumenjve, e ndërtimet e paligjshme që bëhen aty dhe çdokush i sheh, përveçse kur bëhen pesë kate, i ka ngel me i vënë çatinë dhe ne pastaj reagojmë. Duhet absolutisht një qasje proaktive. Duhet të ndryshojë kjo sjellja e trashëguar nga e shkuara ku çdo vit kemi zjarre masive dhe roli i policisë pastaj përfundon duke shpëtuar jetë njerëzish, duke i nxjerrë me zor nga banesat”, tha tutje ai.
Më tej, Lamallari potencoi se detyra e tyre është se çdo zjarr i dyshimtë të hetohet profesionalisht, në bashkëpunim të ngushtë me shërbimin zjarrfikës, Emergjencat Civile, me komunitetin, duke shfrytëzuar teknologjinë dhe ekspertizën më të mirë forenzike dhe Prokurorinë.
