Policia e Kosovës nis sot fushatën vetëdijësuese “Mirë se erdhët në Republikën e Kosovës!”, e cila u dedikohet bashkatdhetarëve që hyjnë në vend gjatë sezonit veror.
Hapja e fushatës do të mbahet në orën 11:00 në Pikën e Kalimit Kufitar në Merdar, ku do të prezantohen masat parandaluese dhe angazhimet policore për rritjen e sigurisë në trafik.
Në kuadër të aktivitetit, Policia do të shpërndajë broshura informuese me këshilla për pjesëmarrësit në komunikacion dhe udhëzime praktike që qytetarët duhet t’i kenë parasysh gjatë udhëtimit dhe me të hyrë në Republikën e Kosovës.
Sipas Policisë së Kosovës, broshura përmban informacione dhe rekomandime që synojnë rritjen e sigurisë në trafik dhe informimin e qytetarëve për rregullat që duhet të respektohen gjatë qëndrimit dhe lëvizjes në vend.
