Flamuri i Kosovës dhe ai i Policisë tashmë janë vendosur.
E që nga kjo e shtunë, zyrtarët policorë të drejtorisë rajonale në Mitrovicë të veriut, u bënë me objekt e zyre të reja.
Tashmë punimet veç se kanë filluar në aspektin e shpërndarjes së rrjetit, vendosjes së kamerave të sigurisë dhe disa pjesë teknike.
Brenda këtij objekti pritet të vendosen, shefi i hetimeve, trafiku rajonal dhe operativa.
“Këtu do të jetë trafiku rajonal, me siguri që do të jenë edhe operativa, zyra ime, zyra jonë administrata dhe shefi i hetimeve apo diçka e tillë. Me siguri do të mbetën edhe njerëz të tjerë përsëri në anën tjetër të ndërtesës që e kemi këtu, por kjo do të thotë lirim shumë i madh hapësirës edhe stacionit Zvecan ku ka qenë trafiku rajonal edhe të stacionit Mitrovicë veri”, tregoi zëvendësdrejtori i policisë për veriun, Veton Elshani.
Elshani thotë se kjo hapësirë iu mundëson ofrim të shërbimeve më profesionale.
“Kjo ndikon në ofrimin e shërbimeve më kualitative ndaj qytetarëve të vendit për arsyeje se ne kemi më shumë hapësirë edhe më shumë kualitet. I përmbush kapacitetet e veta aq sa i ka kjo pjesë e ndërtesës tash e shohim më vonë a kemi nevojë edhe për njerëz të tjerë pasnesër do t’i kemi edhe 117 pjesëtarë të ri të policisë, është shtuar numri i policëve”, tha ai.
Për të parë nga afër objektin këtu erdhën edhe ministri i Punëve të Brendshme, Xhelal Sveçla e ministrja e Ekonomisë, Artane Rizvanolli të cilët nuk pranuan të flasin para kamerës.
