Policia e Kosovës ka arrestuar një person me inicialet M.R, i cili dyshohet se ka kanosur kryeministrin e Kosovës, Albin Kurti përmes rrjeteve sociale.
Kështu ka bërë të ditur për tëvë1.info, zëdhënësi i policisë për rajonin e Prishtinës, Baki Kelani i cili tha se postimet kërcënuese ndaj kryeministrit janë bërë në emër të “Brigada sever”.
Kelani gjithashtu ka thënë se gjatë kontrollimit në adresën e të dyshuarit është gjetur dhe sekuestruar një armë gjuetie pa leje.
“Informacion zyrtar Prishtinë, 10 janar 2025 Me datën 07.01.2025, Sektori për Hetimin e Krimeve të Rënda- DHKOKR Prishtinë, ka iniciuar rast për veprën penale “Kanosje”, ku përmes rrjeteve sociale është kanosur Kryeministri i Republikës se Kosovës, si dhe postime kërcënuese për dhunë në emër të “Brigada sever”. Nga veprimet hetimore është identifikuar i dyshuari M. R. (mashkull kosovar, viti i lindjes 2004), i cili sot me datën 10.01.2025 në Zveçan, është ndaluar dhe është marr në pyetje në prezencë të avokatit mbrojtës sipas autorizimit, si dhe është kryer kontroll në adresën e banimit të tij, ku është gjetur dhe sekuestruar një armë gjuetie pa leje. Pas përfundimit të marrjes se deklaratës me vendim të prokurorit kujdestar nga PTH Mitrovicë, të dyshuarit i caktohet masa e ndalimit Policor prej 48 orëve. Hetimet lidhur me rastin do të vazhdojnë nën autorizimin e prokurorit të rastit nga PTH Mitrovicë”, ka deklaruar Kelani./teve1.info/
