Përmes njoftimit, Policia ka bërë të ditur se personi në fjalë është paraqitur në vendkalimin kufitar dhe pas procedurave ka vazhduar drejt Serbisë pa asnjë problem.
“Sot, në orën 09:28 personi në fjalë (M. M.) me automjetin e tij, është paraqitur në vendkalimin kufitar SPK-Jarinje dhe pas përfundimit të procedurave kufitare i njëjti pa asnjë problem ka vazhduar në drejtim të Republikës së Serbisë. Vlen të potencohet se ndaj të njëjtit nuk ka pasur asnjë incident apo maltretim siç deklarohet apo aludohet në shkrimet e publikuara”, thuhet në komunikatë.
Sipas PK-së, me qëllim të riverifikimit janë ndërmarrë masa ku zyrtarët policorë në Jarinje kanë pyetur edhe palën serbe nëse dikush ka paraqitur ankesë, e që është konfirmuar se një gjë e tillë nuk ka ndodhur.
“Me qëllim të riverifikimit janë ndërmarrë masa shtesë, ku zyrtarët policorë me detyrë në Jarinje kanë pyetur edhe palën serbe nëse dikush ka paraqitur ndonjë ankesë, ku nga mbikëqyrësi i ndërrimit të palës serbe është konfirmuar se deri më tani nuk ka pasur ndonjë ankesë për sjellje jo të mirë apo diçka të kësaj natyre. Andaj, bazuar në gjendjen reale dhe raportet zyrtare, konsiderojmë se opinioni publik duhet të informohet drejt dhe korrekt, në mënyrë që përmes dezinformatave të tilla të mos tentohet të njolloset puna profesionale e zyrtarëve policorë, të mos krijohen tensione dhe pasiguri te qytetarët”, thuhet në njoftim.
