Me një minutë heshtje në nderim të rreshterit policor të vrarë, Muhamet Lika nisi prezantimi i raportit vjetor.
Stacioni Policor i Kaçanikut prezantoi të arriturat dhe rezultatet gjatë vitit 2024 në luftimin e dukurive negative.
Komandanti, Emrush Lalinovci u shpreh se kanë arritur rezultate të dukshme në parandalimin e krimit duke rritur edhe prezencën e tyre në zonën e përgjegjësisë.
“Angazhim tjetër dhe shumë i veçantë ka qenë lufta kundër drogave, me çka në këtë drejtim kemi arritur këto suksese të jashtëzakonshme për të cilat do të shihen në statistikat që do të shihen në raport”, tha Lalinovci.
Sipas raportit të prezantuar, është vërejtur se krahasuar me vitin paraprak, ka pasur rritje të veprave penale në përgjithësi.
“52 kanosje, ngacmime kemi pasë 15, sulme kemi pasë 33, lëndim i lehtë trupor 57 dhe lëndim i rëndë trupor 3, dmth kemi pasë një rritje të numrit të veprave penale 161 me 111 që ka qenë në vitin 2024”, tregoi shefi i sektorit të hetimeve, toger Vahit Hyseni.
Rritje është parë edhe te veprat penale të narkotikëve.
“Një përqindje jashtëzakonisht e madhe e rasteve në krahasim me periudhën e vitit 2024, normalisht në numrin 51 raste nuk janë hi edhe disa raste që për shkak të sasisë së madhe të kompetencës lëndore i janë dorëzu njësisë për hetimin me narkotikë në Ferizaj”, tha shefi i sektorit të hetimeve, Vahid Hyseni.
Po ashtu në konferencë u tha se nga 407 raste, 280 janë arritur të zbulohen ndërkaq të pazbuluara mbeten 127, derisa numri i arrestimeve ishte 25.
Ndërkohë si sfidë, u përmend se mbetet mungesa e personelit të graduar, transferimi i shumë zyrtarëve policorë si dhe mungesa në pajisje logjistike si automjete, kompjuterë, radarë, fotokopje e kamera.
Falënderim për punën e zyrtarëve policorë, pati edhe kryetari i Kaçanikut, Sabedin Vishi.
“Natyrisht edhe bashkëpunimi do të vazhdojë edhe më shumë në mbarëvajtjen e sigurisë, rendit dhe përkushtimit për të mirën e qytetarëve në përgjithësi të Kaçanikut”, tha ai.
Në fund mirënjohje iu ndanë institucioneve bashkëpunuese, por edhe zyrtarëve policorë të dalluar gjatë vitit 2025.
