Federata e Basketbollit të Kosovës (FBK) ka publikuar raportin zyrtar lidhur me incidentet e ndodhura gjatë ndeshjes ndërmjet KB Bashkimi dhe KB GO+Peja, e cila u zhvillua në Prizren në prani të rreth 2 mijë shikuesve.
Sipas raportit, ndeshja ka qenë përgjithësisht fer dhe korrekte, me përjashtim të çerekut të dytë (Q2), kur nga tribunat janë hedhur mjete të forta – shkrepëse, ku njëra prej tyre ka goditur lojtarin e KB GO+Peja, Dardan Berisha, i cili ka pësuar lëndime në pjesën e ballit.
FBK bën të ditur se pas këtij incidenti, gjyqtari kryesor dhe vëzhguesi i ndeshjes kanë urdhëruar zbrazjen e tribunës nga Sektori B, mirëpo sipas raportit zyrtar, Policia dhe sigurimi privat nuk kanë zbatuar këto urdhra. Si pasojë, loja është ndërprerë për rreth 35 minuta.
Në raport theksohet gjithashtu se edhe pas rifillimit të ndeshjes kanë vazhduar ofendimet përmes koreve si dhe janë evidentuar raste të tjera të hedhjes së mjeteve të forta, konkretisht 2–3 shkrepëse të tjera nga tribunat.
Raporti zyrtar i FBK-së ka shërbyer si bazë për hapjen e procedurës disiplinore dhe për shqiptimin e dënimeve ndaj klubeve dhe individëve të përfshirë, ndërsa federata ka theksuar se siguria e lojtarëve dhe zyrtarëve mbetet prioritet kryesor në organizimin e garave.
Raporti i plotë dhe pa ndërhyrje:
2000 shikues. Ndeshja ishte fer dhe korrekte, me përjashtim të Q2, kur nga tifozët u hodhën mjete të forta shkrepëse nga një e tillë u godit lojtari Dardan Berisha, i cili pësoi lëndime në pjesën e ballit, Policia dhe sigurimi privat nuk zbatuan urdhrat e gjyqtarit kryesor dhe të vëzhguesit të ndeshjes për zbrazjen e tribunës nga Sektori B, pas hedhjes
së mjeteve piroteknike dhe goditjes së lojtarit Dardan Berisha, duke sjellë ndërprerjen e lojës për 35 minuta. Edhe me vonë ka pas ofendime në kore dhe hedhje të mjeteve të forta 2-3 shkrepëse.
