Policia e Kosovës ka arrestuar një person në Lipjan, i cili dyshohet se ka shpërndarë përmes rrjeteve sociale materiale me përmbajtje të shfrytëzimit dhe abuzimit seksual të fëmijëve.
Sipas njoftimit zyrtar të Policisë së Kosovës, arrestimi është realizuar nga Drejtoria për Hetimin e Krimeve Kibernetike, pas veprimeve të ndërmarra hetimore që çuan në identifikimin e të dyshuarit, një mashkull kosovar.
Ngjarja ka ndodhur më 17 dhjetor 2025, rreth orës 13:30, në komunën e Lipjanit. Pas arrestimit, i dyshuari është intervistuar në prani të organeve kompetente dhe, me urdhër të prokurorit të rastit, është liruar për t’u proceduar në procedurë të rregullt.
Policia e Kosovës ka bërë të ditur se hetimet lidhur me këtë rast janë duke vazhduar, ndërsa rasti është iniciuar nën veprën penale “Materiale me përmbajtje të shfrytëzimit dhe keqpërdorimit seksual të fëmijëve”.
