Policia e Kosovës ka arrestuar një 23-vjeçar në magjistralen Ferizaj-Prishtinë, në fshatin Prelez i Muhaxherëve, i cili ishte në kërkim nën akuzën për posedim të paautorizuar të substancave narkotike, i dënuar më tetë muaj burgim.
F. M ishte ndaluar për tejkalim të shpejtësisë dhe pas verifikimit të dokumenteve ka rezultuar se gjendet në kërkim policor për veprën penale.
“Sot, në ora 18:00, derisa policët e Njësisë së Komunikacionit Rrugor ishin në pikë kontrolli në rrugën magjistrale Ferizaj -Prishtinë, në fshatin Prelez i Muhaxherëve kanë ndaluar një automjet, shoferi i së cilës kishte bërë kundërvajtje tejkalim të shpejtësisë dhe pas kontrollimit të dokumenteve ndaj të njëjtit iniciohet procedurë gjyqësore për tejkalim të shpejtësisë dhe drejtim i automjetit pa patent shoferi, mirëpo pas verifikimit të tij rezulton se F.A (M/K) i moshës 23 vjeçar ishte në kërkim policor. Ai ishte i kërkuar në bazë të urdhëresës së Gjykatës Themelore në Ferizaj për veprën penale” Posedim i paautorizuar i substancave narkotike, psikotrope ose analoge” me dënim burgimi prej tetë (muajve dhe i njëjti është shoqëruar në stacionin e policisë në Ferizaj”, thuhet në komunikatë.
I njëjti sipas PK-së gjatë përgatitjeve të dokumenteve për ta dërguar në vuajtje të dënimin ka sulmuar dy zyrtarë policor dhe ka dëmtuar derën e një zyre në stacionin e policisë, ku me vendim të prokurorit i është iniciuar edhe një rast penal “Sulm ndaj personit zyrtar dhe dëmtim i pronës publike”.
“Gjatë kompletimit të dokumentacionit dhe përgatitjeve për ta dërguar në vuajtje të dënimit, F.A ka sulmuar dy zyrtarë policor dhe ka dëmtuar derën e një zyre të stacionit të policisë. Ndaj tij me vendim të prokurorit kujdestar nga Prokuroria Themelore në Ferizaj është inicuar edhe një rast penal ” Sulm ndaj personit zyrtar dhe dëmtim i pronës publike” dhe i njëjti është dërguar në vuajtje të dënimit për procedura tjera”, thuhet në komunikatën e PK-së./teve1.info/