Si pasojë e reshjeve të mëdha të shiut, rruga magjistrale Ferizaj–Gjilan, në fshatin Dardani, është bllokuar plotësisht për qarkullim të automjeteve.
Sipas njoftimit të Drejtorisë Rajonale të Policisë në Ferizaj, bllokimi ka ndodhur për shkak të sasisë së madhe të ujit në rrugë, pas reshjeve që kanë përfshirë fshatrat Dardani, Ramjan dhe Zllatar.
Policia ka bërë të ditur se njësitet relevante ndodhen në vendin e ngjarjes dhe po e menaxhojnë trafikun.
“Rruga magjistrale Ferizaj–Gjilan, në fshatin Dardani, për shkak të sasisë së madhe të ujit, është e bllokuar plotësisht për qarkullim të mjeteve, deri në një njoftim tjetër”, thuhet në njoftim.
Autoritetet kanë rekomanduar përdorimin e rrugëve alternative për qarkullim:
Nga drejtimi Ferizaj–Gjilan, shoferët udhëzohen të përdorin rrugën përmes fshatit Zllatar, ndërsa nga drejtimi Gjilan–Ferizaj rekomandohet rruga Dardani–Zllatar, përmes segmentit pranë kompanisë “Metali i Ri”.
Policia ka bërë thirrje për kujdes në komunikacion dhe mirëkuptim nga qytetarët deri në normalizimin e gjendjes. 
