Një 21-vjeçare ka tentuar të hidhet nga ballkoni i katit të katërt të një kompleksi banesor në mëngjesin e sotëm në Ferizaj.
Sipas njoftimit të policisë, njëri nga zyrtarët policor ka arritur që ta shpëtojë vajzën nga tentativa për vetëvrasje.
“Menjëherë pas pranimit të informatës, patrullat policore kanë dalë në vendngjarje, ku fillimisht kanë kontaktuar me dëshmitarët dhe më pas kanë vërejtur vajzën në anën e jashtme të ballkonit. Policia ka tentuar ta qetësojë përmes komunikimit, ndërkohë që njëri prej policëve është ngjitur në banesën ku ndodhej ajo. Për shkak të urgjencës dhe rrezikut të lartë, polici është detyruar të hapë derën me forcë dhe ka ndërhyrë me shpejtësi në ballkon, duke arritur ta kapë dhe ta tërheqë viktimën brenda rrethojave, me ndihmën edhe të një kolegu tjetër”, thuhet në njoftimin e policisë.
Policia ka bërë të ditur se 21-vjeçarja është duke u trajtuar në QKUK pas gjendjes së saj të rëndë psikike dhe emocionale.
“Familjarët e saj janë njoftuar menjëherë pas ngjarjes. Pas trajtimit fillestar në Qendrën Emergjente në Ferizaj, ajo është transferuar në Klinikën Universitare të QKUK-së në Prishtinë për kujdes dhe trajtim të mëtejmë. Policia e Kosovës mbetet e përkushtuar në mbrojtjen e jetës së qytetarëve dhe apelon tek të gjithë që të raportojnë raste të ngjashme, në mënyrë që të parandalohen situatat tragjike”, thuhet ndër të tjera./teve1.info/
