Një zyrtare policore është plagosur nga kolegu i saj brenda objektit në stacionin policor jugu në Prishtinë. Ngjarja dyshohet se ndodhi pas një shkrepje aksidental ku copëzat e gëzhojes goditen 25 vjecare. Pas këtij rasti, zyrtari policor është suspenduar nga puna.
E premtja nuk nisi mirë për dy zyrtarë policor në Prishtinë.
Në orët e mëngjesit, një polic aksidentalisht ka plagosur kolegen e tij brenda vendit të punës.
E gjithë ngjarja ndodhi pas shkrepjes aksidentale të armës e si pasojë, zyrtarja policore u godit nga copëzat e gëzhojës.
Kështu njoftoi Inspektorati Policor përmes një komunikate për media.
“Lidhur me rastin, është njoftuar edhe prokurori i shtetit, i cili do të udhëheqë hetimet e mëtejshme në bashkëpunim me Inspektoratin Policor të Kosovës (IPK). Arma e zjarrit është konfiskuar, ndërsa zyrtari policor që shkaktoi aksidentalisht shkrepjen është suspenduar.Hetuesit e IPK-së pritet të ndërmarrin edhe veprime të tjera hetimore drejt ndriçimit të të gjitha rrethanave të këtij rasti.”, thuhet në komunikatë.
Pas plagosjes 25 vjeçarja u dërgua në Qendrën Klinike Universitare të Kosovës.
Për gjendjen e polices së plagosur, shfaqën interesim edhe shumë kolegë të saj që erdhën në Klinikën Ortopedike.
Zyrtarja policore ka marrë lëndime në këmbën e majtë dhe gjendja e saj është stabile.
“Siç jeni në dijeni ka ndodhur një incident, e ka një lëndim një predhë në këmbë dhe pritet që ti nënshtrohet operimit urgjent për heqjen e predhës, sapo të lirohet një sallë sepse kemi qenë në program të rregullt të operimeve. Momentalisht gjendjen e ka stabile, nuk është në rrezik për jetën, mirëpo gjatë ndërhyrjes operative është e mundshme të ndodhë gjithçka.”, ka thënë drejtori i Klinikës së Ortopedisë, Xhavit Gashi.
Javë më parë, një zyrtar policor aksidentalisht ka plagosur nënë e tij në lagjen Kolovicë në Prishtinë.