Ishin suspenduar në vitin 2022 me rekomandim të Inspektoratit Policor të Kosovës.
65 punonjës të Policisë së Kosovës, nga ajo kohë vazhdojnë të marrim 50 për qind të pagës, ani pse ligji nuk ua lejon këtë.
Sipas Ligjit për Policinë, një zyrtar policor që është i suspenduar duhet ta marrë këtë pagë deri në gjashtë muaj, e më pas të vendoset të rikthehet në punë apo jo.
Kjo është evidentuar edhe në raportin e Zyrës Kombëtare të Auditimit për vitin 2024, ku thuhet se për këtë nga buxheti janë ndarë 55 mijë e 550 euro.
“Ne identifikuam se shtesën e plotë për kushte specifike të punës ishin duke e marrë 65 zyrtarë policorë të suspenduar, edhe pse ata nuk ishin duke e ushtruar funksionin e rrjedhimisht nuk kishin ndonjë rrezikshmëri… Nga lista e zyrtarëve të suspenduar e pranuar nga stafi përgjegjës vërehet se kishte edhe zyrtarë policorë që ishin suspenduar nga viti 2022 dhe ende vazhdojnë të kompensohen me 50 për qind të pagës”, thuhet nga ZKA.
Për këtë, Tëvë1 ka dërguar pyetje në Policinë e Kosovës dhe IPK, por që deri në publikim të kronikës nuk ka pasur përgjigje.
E ish-shefi i hetimeve në autoritetin mbikëqyrës të Policisë, Jetulla Aliu thotë se kjo dukuri vazhdon të jetë shqetësuese në këtë institucion.
“Sidomos Prokuroria dhe Gjykata duhet ta kenë parasysh kur kanë të bëjnë me një zyrtar publik atëherë t’i marrin veprimet sa më shpejtë që është e mundshme sepse po kemi të bëjmë me dëmtimin e imazhit, dëmtimin e buxhetit e mbi të gjitha kemi të bëjmë edhe me prezumimin e pafajësisë për një zyrtar. Mirëpo prapë konsideroj se nuk është e mirë kjo që më tepër se gjashtë muaj vazhdojnë sepse kemi të bëjmë me një 50 për qind të pagës”, ka thënë ai.
Vazhdimisht në raportet e Auditimit kjo mbetet si një ndër shqetësimet kryesore pasi që vlerësohet se ndikon negativisht edhe në punën e këtij institucioni.
