Është vetura e radhës, që e kishte fatin të ndalohet.
Por, shoferi i saj, nuk do të gjobitet.
Në vend të gjobës, atij të hënën iu dhurua kjo broshurë.
Krejt kjo, pjesë e një fushate vetëdijesuese të njësisë së trafikut në Ferizaj.
Përmes këtyre broshurave, vozitësit u këshilluan për rrezikun që vjen nga shpejtësia.
E kjo u mirëprit nga shoferët.
“Shumë e mirë fushata vetdijësuese, duhet me u vetdijësu njerëzit se shpejtësia vret na e dijmë këtë por një pjesë e njerëzve nuk po e dijnë dhe po bëjnë gabime për atë po ndodhin këto gabime dhe gjërat”, u shpreh një shofer.
Detajet rreth fushatës, për Tëvë1, dha Komandanti i kësaj njësie.
“Në rajonin e Ferizajt gjatë vitit 2024, kanë ndodhur rreth dy mijë aksidente me lëndime dhe dëme materiale, kurse gjatë vitit 2025 kanë ndodhur mbi dy mijë aksidente, ku kryesisht shkaktarët kryesorë kanë qenë mospërshtatja e shpejtësisë me kushtet e rrugës. Mirëpo edhe aktivitetet nuk kanë munguar, gjatë vitit 2024 në rajonin e Ferizajt janë shqiptuar rreth 69 mijë gjoba për kundërvajtësit në trafik, kurse gjatë 2025 kemi shqiptuar rretj 75 mijë gjoba për shoferët që kanë kryer kundërvajtje në komunikacion”, ka thënë Roshaj.
Bashkë me zyrtarët policor, në aksion pjesëmarrës ishin edhe të rinjtë e Ferizajt.
“E dimë se kur flasim për kilometra, apo për shpejtësi, nuk jemi duke folur vetëm për shpejtësinë, kilometrat, apo orët, mirëpo jemi duke folur edhe për jetë. Pra kur vozisim vetdijësueshëm dhe kur vozisim me shpejtësi normale dhe sipas rregullave, të komunikacionit atëherë jemi më të sigurt në vozitje”, u shpreh Kamberi.
Këtë fushatë të qëlluar po e quajnë ekspertët e komunikacionit.
“Dhe si për shumë shoferë dhe pjesëmarrës në trafik, shpejtësia nuk është vetëm treguesi që ne e shohim në tabelë e instrumenteve, por është një faktor shumë i rrezikshëm që shkakton pasoja nganjëherë edhe fatale”, ka thënë Halili.
Fushata “Shpejtësia nuk është aftësi, është rrezik” do të zgjasë deri më 28 shkurt, ku përfshinë edhe ligjërata nëpër shkolla.
Ndersa nga 1 marsi do të shqiptohen masa më të rrepta ndaj kundërvajtësve në trafik.
