Murat Avdiu çdo ditë kalon me veturë në rrugën Kllokot – Gjilan, e jo rrallë herë i është dëmtuar.
Kjo për shkak të gropave të shumta në rrugën mes fshatit Kllokot të Vitisë e Livoq të Gjilanit.
“Rruga është katastrofë. Prishjet e kerreve, po duhet me punu veç për kerr. Ja kerri ja gomat ja, rruga katastrofë. S’ki as ka ik as s’ki kah del”, tha Avdiu.
Megjithatë riparimi i rrugës ka filluar gjatë kësaj jave.
Por këtë, Avdiu nuk e sheh të efektshme.
“Kurgjo, kurgjo hiç. Veç me qep, sikur kur t’i qep pantallonat. S’janë duke bërë sen, po s’kemi shtet, s’kemi kurgjo edhe çka me bo, jeta vazhdon”, tha tutje ai.
Edhe Rexhep Rama, pronar i një lokali mes këtyre dy fshatrave ankohet për rrugën me gropa.
Ai tregon edhe shqetësimet e mërgimtarëve lidhur me gjendjen e rrugës.
“Çka me folë për rrugë që rruga katastrofë. Këtu po i shoh njerëzit ankohen, vijnë i prishin gomat sidomos këta të jashtit mbesin natën duke i mëshu gropave, t’u i prish gomat, me një fjalë t’u u anku sa që disa prej mllefit thonë ‘’më mirë mos me ardhë në Kosovë se kur po vijmë në Kosovë’’, se shumë gropa të mëdhaja, rruga katastrofë”, tha Rama.
Për situatën e rrugës i zhgënjyer është shprehur edhe kryetari i Komunës së Vitisë, Sokol Haliti.
“Rruga Kllokot – Gjilan e cila tash e tri vite faktikisht ka mbetë peng edhe është devastu është shkatërru vërtetë shumë edhe është njëfarë meremetimi, njëfarë pune e lodhtë në atë rrugë. Vërtetë është shembull jo i mirë i ndërtimit të infrastrukturës në rrugë magjistrale”, tha Haliti.
Gropat mes fshatit Kllokot e Livoq nga fillimi i kësaj jave po mbushen me zall e me kocka. Ndërsa po punohet edhe për trotuar.
