Është rruga që të shpije drejt institucionit më të rëndësishëm në Evropë.
Këtu deputeti shqiptar në Parlamentin Evropian, Amet Gjanaj, ka marrë një mision të vështirë.
Janë këto plot 751 libra të autorit Nusret Pllana.
Bëhet fjalë për librin “”Terrori i Serbisë pushtuese mbi shqiptarët”.
Të gjitha këto në vitin 2018 u synua t’u bëhen dhuratë deputetëve në Parlamentin Evropian.
Por, a pati sukses ky plan i Pllanës dhe Gjanajt?
“Është fut një numër prej 751 ekzemplarësh, që në kg bëjnë 4 mijë 500 kg. E kanë pranuar në PE, që ishte në shenjë të 10 vjetorit të Pavarësisë së Kosovës, por edhe në shenjë të 550 vjetorit të vdekjes së Skenderbeut”, tha Pllana.
Në këtë formë, libri që flet për krimet serbe në Kosovë, arriti në duart e deputetëve të Parlamentit Evropian.
Por, atë që e pranoi parlamenti në kryeqendrën evropiane, nuk e bëri ai i Kosovës.
Pllana thotë se dështuan dy tentimet që këtë libër t’ua dhuronte deputetëve të Kuvendit të Kosovës.
“Kam insistuar disa herë, po pa sukses. Ka insistuar edhe Ramush Haradinaj në kohën sa ishte kryeministër. Në vitin 2019 i ka blerë 110 libra për t’ua dhuruar deputetëve, por pa sukses. Edhe vitin e kaluar edhe libri i vogël “Mos harro kurrë”, u refuzua për të hyrë në Kuvendin e Kosovës…”, u shpreh ai.
Por, pse insistoi Pllana që këtë libër t’ua dhuronte deputetëve kosovarë?
Pavarësisht që nuk u lejua të futet në Kuvend, Pllana thotë se ky është libri më i promovuar në botë.
“Ka arrit të depërtojë deri në Australi, ju e dini që nuk ka libër më të promovuar në botë, madje tri herë është futur edhe në bibliotekën e Kongresit Amerikan”, deklaroi Pllana.
Ndërkohë 110 librat që nuk u lejuan në sallën plenare, nuk u kthyen kurrë tek autori.
Se ku kanë mbetur këto libra, Tëvë1 ka pyetur edhe në Kuvendin e Kosovës.
Por, këta të fundit nuk kanë kthyer përgjigje të hënën.
Kronika e gazetarit Fidan Zejnullahu.
