Në pranverën e vitit 1999, Sllobodan Millosheviq, mblodhi kabinetin e tij.
E nga këtu, dolën me një vendim.
Është ky dorëshkrimi i Obrad Stevanoviq.
Ish-zëvendësministri i Punëve të Brendshme të Serbisë në ditarin e tij, e shkroi moton “Nuk ka kufomë, nuk ka krim!”
Por, çfarë kuptimi kishte kjo moto gjatë luftës në Kosovë?
“Kreu serb, zyrtarët e lartë ushtarakë e policorë, janë dakorduar që me i fshehë provat e krimit, duke i larguar trupat jashtë territorit që një ditë prokuroria e Tribunalit të Hagës do të hulumtojë e do t’i gjej këto prova”, tha Bekim Blakaj nga Fondi për të Drejtën Humanitare.
Kështu në prill të vitit ‘99, një peshkatar në fshatin serb, Tekijas, pa një kamion që doli mbi sipërfaqen e lumit Danub.
Fillimisht u mendua se bëhej fjalë për një aksident.
Por, pas hetimeve doli se brenda këtij kamioni-frigorifer ndodheshin trupat e mbi 80 shqiptarëve të vrarë në Kosovë.
Më pas, ky aksion i shtetit serb, u zhvillua në disa faza.
Në secilën prej tyre, trupat e kosovarëve të vrarë, në mënyrë të organizuar u transportuan për në Serbi.
Por, cila ishte mosha e të vrarëve, e ka treguar në Tribunalin e Hagës, një ish-pjesëtar e Departamentit të Policisë Kriminalistike në Serbi.
Boshko Radojkoviq, ish-pjesëtar i Policisë Kriminalistike të MPB-së në Serbi.
“Kufomat kanë qenë të dy gjinive, me struktura të ndryshme moshe. Unë e di me siguri që kanë qenë edhe dy fëmijë. Një djalë 5-6-vjeçar, dhe një vajzë 8-9- vjeçare.
Dy vjet më vonë, një zbulim tjetër goditi Serbinë.
Brenda një varri masiv në Qendrën për Stërvitje të Njësisë Speciale në Batajnicë u gjenden plot 744 mbetje mortore të kosovarëve.
Por, çfarë do të thotë gjetja e trupave të shqiptarëve në këto lokacione?
Bekim Blakaj, Fondi për të Drejtën Humanitare
“Tregon qartë që ky ka qenë ndërmarrje e zyrtarëve të lartë të shtetit, ai lokacion ka qenë Qendrën për Stërvitje të Njësisë Speciale”, tha Blakaj.
E sa ishte e vështirë identifikimi i këtyre trupave e ka treguar mjeku i Institutit të Mjekësisë Ligjore, Arsim Gërxhaliu.
“Është gjetur personi i cili ka qenë i vrarë në poligonin e gjuajtjes në Prizren. Një pjesë kockore është gjetur në Batajnicë dhe një pjesë tjetër në Vërmicë. Në tri lokacion është gjetur i njëjti person”, tha ai.
Përveç këtyre lokacioneve, edhe në poligonin policor në PetrovoSelo në Serbi, janë gjetur mbetjet mortore të 61 shqiptarëve.
Kronika e gazetarit Fidan Zejnullahu.
