Ministri i Financave i ekstremit të djathtë, Bezalel Smotrich, njoftoi të mërkurën se planifikon të miratojë tenderët për ndërtimin e më shumë se 3,000 njësive banesore në projektin shumë të diskutueshëm të vendbanimit E1 midis Jerusalemit dhe Ma’ale Adumim në Bregun Perëndimor, duke thënë se ky veprim “varros idenë e një shteti palestinez”.
Sipas lajmit të “The Times of Israel”, Smotrich tha se do të miratojë tenderin për ndërtimin e 3.401 shtëpive midis Kudsit Lindor të pushtuar nga Izraeli dhe vendbanimit Ma’ale Adumim, të themeluar në tokën që u është grabitur palestinezëve në Bregun Perëndimor.
“Miratimi i planeve të ndërtimit në E1 varros idenë e një shteti palestinez dhe vazhdon hapat e shumtë që po ndërmarrim në terren si pjesë e planit de facto të sovranitetit që filluam ta zbatojmë me krijimin e qeverisë”, tha Smotrich në një deklaratë.
“Pas dekadash presioni dhe ngrirjesh ndërkombëtare, ne po shkelim konventat dhe po e lidhim Ma’ale Adumim me Jerusalemin. Ky është sionizmi në formën e tij më të mirë – ndërtimi, vendosja dhe forcimi i sovranitetit tonë në Tokën e Izraelit”, tha Smotrich, i cili është gjithashtu ministër në Ministrinë e Mbrojtjes përgjegjës për çështjet civile të Bregut Perëndimor të pushtuar.
Ndërtimi i mundshëm i një lagjeje të re për vendbanimin Ma’ale Adumim në të ashtuquajturën zonë E1 ka qenë prej kohësh shkak për alarm në bashkësinë ndërkombëtare.
Kjo do ta ndante Bregun Perëndimor në rajone veriore dhe jugore dhe do të pengonte zhvillimin e një metropoli palestinez që lidh Jerusalemin Lindor me Betlehemin dhe Ramallahun, për të cilin palestinezët kanë shpresuar prej kohësh se do të shërbente si themeli i shtetit të tyre të ardhshëm.
Smotrich tha të enjten se kryeministri Benjamin Netanyahu e mbështet planin.
Smotrich, i cili mban një pozicion të vogël ministror brenda Ministrisë së Mbrojtjes, gjë që i jep atij të drejtë të gjerë pushteti mbi ndërtimin e vendbanimeve, tha se miratimet në projektin e ngrirë prej kohësh të vendbanimeve E1 janë një përgjigje ndaj një vale vendesh perëndimore që njoftuan ose paraqitën plane për të njohur një shtet palestinez në Kombet e Bashkuara muajin e ardhshëm.
“Sot, kushdo në botë që përpiqet të njohë një shtet palestinez do të marrë një përgjigje nga ne në terren”, deklaroi ai. “Sot, po shkruajmë një kapitull historik në historinë e shpengimit të popullit të Izraelit në tokën e tyre.”/teve1
