Deri tani dimë që ky dokument përbëhet nga një faqe e gjysmë ose dy, të strukturuara në rreth dhjetë nene.
Tashmë Bashkimi Evropian, si ndërmjetësues i dialogut, i ka pranuar edhe përgjigjet e Kosovës e Serbisë, në lidhje me këtë propozim.
Shefi i diplomacisë serbe, Ivica Daçiq ka deklaruar se Serbia nuk e pranon këtë draft, të njohur si franko-gjerman.
Kurse kryeministri i Kosovës, Albin Kurti e ka cilësuar këtë propozim, si hap në drejtimin e duhur.
Në bazë të deklarimeve, është thënë se pika 2 e këtij drafti parasheh që palët ta njohin integritetin territorial të njëra-tjetrës, çka besohet se ka ndikuar që Serbia ta konsiderojë atë si të papranueshëm.
Politologu Dritor Arifi thotë se drafti franko-gjerman ndërlidhet me parimet e kartës e OKB-së, në pikat ku përmendet respektimi i integritetit territorial.
Në rast se Kosova e pranon propozimin, Arifi thotë se Bashkësia ndërkombëtare duhet të ndihmojë në avancimin e shtetësisë së saj.
Liderët e vendit, kanë premtuar se në të ardhmen e afërt plani franko-gjerman do të bëhet i ditur edhe për publikun.
Kronika e gazetarit Valmir Gallopeni.
