Anëtari i Lidhjes Demokratike të Kosovës Gezim Plakolli, ka thënë Lëvizja Vetëvendosje ka krijuar një problem të ri me çështjen e nënkryetarit nga komuniteti serb për moskonstituimin e Kuvendit.
Ai ka thënë se kjo po bëhet në mungesë të votave për Qeverinë.
Sipas tij, një situatë e tillë është e panevojshme.
“Absurde dhe e panevojshme për nevojat tona. Partia fituese ka krijuar një problem i cili nuk është i nevojshëm për një pozitë e cila nuk ka aspak rëndësi sa i përket funksionalizmit të Kuvendit e gjitha është bërë për kalkulime politike në mungesë të numrit të votave për formimin e Qeverisë.
E shohim të panevojshme, e gjitha kjo ka të bëjë me mungesën e numrave për vazhdimin e formimit të Qeverisë”, ka thënë Plakolli në emisionin “Ditari” në Tëvë1.
Ai ka thënë se për tejkalimin e situatës duhet një marrëveshje politike, por sipas Plakollit Vetëvendosje nuk e njeh bashkëpunimin.
“Jemi ithtarë të bashkëpunimit, koalicioni është i pashmangshëm, partia fituese duhet të zbres nga egoja e saj dhe t’ia shtijë dorën partive politike nëse duam të ecim përpara. Partia e parë nuk e njeh koalicionin, bashkëpunimin, çdo bashkëpunim ajo e njeh si nënshtrim. Propozimi i Rashiqit për nënkryetar të Kuvendit të Kosovës është kalkulim politik”, ka thënë ai.
Kuvendit i Kosovës ka dështuar ta zgjedh nënkryetarin nga komuniteti serb. Asnjë nga deputetët e Listës Serbe nuk ka arritur të marrë votat e mjaftueshme. Ndërsa, për nënkryetar nuk është votuar as Nenad Rashiq.
Pavarësisht kësaj, kryetari i Kuvendit, Dimal Basha ka thënë se seanca konstituive llogaritet e mbyllur, pasi siç ka thënë ai pika e katërtë e rendit të ditës është ezauruar.
Ndërsa, siç ka raportuar Tëvë1, Gjykata Kushtetuese ka vendosur mas të përkohshme lidhur me çështjen e konstituimit të Kuvendit pas ankesës së Listës Serbe.
