Dy persona janë plagosur nga arma e zjarrit në rrugën “Fahri Fazliu” në Rahovec, derisa dy të tjerë janë dorëzuar në Polici, raporton teve1.info
Sipas zëdhënësit të Policisë për rajonin e Gjakovës, Sheremet Eelzaj, të plagosurit janë dërguar në Spitalin e Gjakovës kurse në shtëpinë e dy të dyshuarve janë konfiskuar gjashtë armë të ndryshme dhe municion.
Sipas Elezajt, rasti është raportuar në orën 16:40 kurse aktualisht është duke u punuar për të ndriçuar rrethanat e rastit.
“Rasti ka ndodhur rreth orës 16:40, ndërsa Rreth orës 16:40, është raportuar se dy persona në rrugën “Fahri Fazliu” në Rahovec ishin qëlluar me armë. Policia menjëherë ju ka përgjigjur rastit dhe nga informacionet e para të marra është konfirmuar se dy persona, meshkuj të moshës madhore janë dërguar në spitalin rajonal në Gjakovë të plagosur nga amë zjarri. Në ndërkohë në Stacionin Policor në Rahovec janë dorëzuar dy persona meshkuj të moshës madhore e që dyshohet se janë të përfshirë në rast. Lidhur me rastin është organizuar operacion bastisje ku janë konfiskuar gjashtë armë të ndryshme dhe municion.
Aktualisht hetuesit policor, në koordinim me prokurorin e shtetit janë duke punuar për të ndriçuar dhe sqaruar të gjitha rrethanat që kanë të bëjnë me këtë rast”, ka deklaruar Elezaj.
