Në këtë gjendje ka qenë Burgu i Dubravës gjatë vitit 1999, ku për katër ditë radhazi forcat serbe plagosën e vranë brenda qelive të burgosurit shqiptarë.
Këtu u krye njëra ndër masakrat më të tmerrshme nga regjimi i kriminelit serb, Sllobodan Millosheviq.
E të enjten u shënua 23-vjetori i kësaj mizorie.
Njëri ndër të mbijetuarit e kësaj masakre, Isak Shabani ka emocione dhe sot kur flet për atë kohë.
Ky thotë se ai bashkë me shokët e tij që gjendeshin në këtë burg, edhe sot nuk e dinë arsyen se si kanë shpëtuar nga duart e tyre.
Përveç tij, nga kjo masakër ka shpëtuar edhe deputeti i Lëvizjes Vetëvendosje, Enver Dugolli.
I mbijetuari i masakrës ka shpërndarë disa letra me emrat e gardianëve udhëheqës që kanë qenë në këtë burg, e që sipas tij dinë më shumë rreth asaj ngjarje.
“Mbrapa meje po i shihni emrat e të vrarëve, në fund do të merrni edhe një liste të gardianëve e udhëheqësve dokument zyrtar i vitit 1997 që mund të gjeni dhe janë përfaqësish të gjithë zyrtarët e burgut të Dubravës që kanë marr pjesë ose dinë më shumë rreth burgut të Dubravës”, tha Dugolli.
Këtë masakër e ka përkujtuar edhe shefja e shtetit, Vjosa Osmani.
Në këtë masakër, u vranë rreth 160 shqiptarë dhe mbi 300 të tjerë u plagosën.
Drejtësia për këtë krim nuk është vënë ende.
Raporti i gazetares Fetije Kamberi.
