Italianët që rrezikojnë të përfundojnë në spital për shkak të koronavirusit, tani do të mund të trajtohen lehtësisht me një nga antiviralët e disponueshëm.
Pa burokracinë dhe komplikimet që deri tani kanë bllokuar efektivisht përdorimin e tyre, antiviralët merren me recetën e mjekut të familjes dhe kutia me pilula merret më pas në farmacinë më të afërt.
Ky është lehtësimi i madh që mund të vendoset sot nga Agjencia Italiane e Mjekësisë në mbledhjen e komisionit tekniko-shkencor.
Revolucioni mund të shënojë një ndryshim kursi në luftën kundër Covid-it dhe një kthim në një menaxhim më “të zakonshëm” të urgjencës shëndetësore.
Pak ditë më parë, ministrja e Shëndetësisë Speranza e paralajmëroi këtë: “Tani që kemi më shumë doza në dispozicion, duam të lejojmë mjekët e përgjithshëm të japin receta për të inkurajuar akses sa më të gjerë”.
Sot, pra, pritet drita jeshile e AIFA-s, e cila përveç autorizimit të recetës së mjekut të familjes, do t’u mundësojë të infektuarve që me paraqitjen e recetës të marrin terapinë direkt në farmaci pa komplikime të mëtejshme.
Risia do të ketë të bëjë veçanërisht me dy ilaçe (pilula) antivirale e marrë nga goja: “Paxlovid i Pfizer” – i cili ka shfaqur 90% efikasitet në shmangien e formave të rënda – si dhe “Molnupiravir i Msd”.
Dy terapi këto të indikuara për pacientët e lehtë deri në ata mesatar, të cilët kanë faktorë rreziku specifik për Covid të rëndë, të tillë si: tumoret, insuficienca renale kronike, sëmundjet e rënda pulmonare, imunodefiçenca parësore ose ajo e fituar, obeziteti, sëmundjet e rënda kardiovaskulare dhe diabeti./iconstyle.al
